2010-01-21 19:23:06 Արա Աբրահամյան. ‘Հայ-թուրքական հարաբերությունների կարգավորման խնդրի շուրջ չկան կողմ կամ դեմ կարծիքներ’ ‘Հայ-թուրքական հարաբերություններն այսօր Ռուսաստանի հայերի միության համար ամենամտահոգիչ հարցն է։ Չի կարող գտնվել մեկ հայ, ում չհուզի այս հարցը, քանի որ սա ազգի շահի եւ անվտանգության հարցն է’, -այս մասին այսօր ընդունելությունների տանը հայտարարեց ՌՀՄ նախագահ Արա Աբրահամյանը, հավելելով, որ հայ-թուրքական սահմանի բացման դրական կողմը համարում է ճանապարհների բացումը, որի արդյունքում Հայաստանը իր հոգսերը հոգալու համար կունենա լրացուցիչ ճանապարհ` ինչը կնպաստի երկրի փոքր եւ միջին բիզնեսի զարգացմանը։
‘Մենք սահմանի բացմամբ ամբողջ աշխարհին եւս մեկ անգամ կապացուցենք մեր ով լինելը, որ մենք պատրաստ ենք երկխոսությանը, որ մենք Թուրքիայի հետ կապված մեկ քայլ առաջ արեցինք’,-ընդգծեց նա եւ շարունակեց. ‘Ի վերջո մարդիկ իրնեց վիճակի բարելավումը կապում են հայ-թուրքական սահմանի բացման հետ’: Ա. Աբրահամյանի խոսքով, հայ-թուրքական հարաբերությունների կարգավորման խնդրի շուրջ չկան կողմ կամ դեմ կարծիքներ: ‘Ամբողջ հայությունն այսօր մի կողմ է, մարդիկ կան որ զգայուն են, մարդիկ կան իրենց կարծիքն ու մոտեցումը ունեն։ Մենք պետք է համբերատար միմյանց լսենք, փոխանակենք մեր մտքերը։ Չէ որ նախագահի այցելության նպատակը համայնքի կարծիքը լսելն էր եւ դրա հիման վրա որոշում կայացնելը’,-հավաստիացրեց նա, նկատելով, որ առ այսօր Թուրքիան ոչինչ չի արել, որ հայերը իրեն հավատան, քանի որ Հայաստանին պահում է շրջափակման մեջ եւ միշտ ձգտում է ինչ որ հարցերում իր ցանկությունները հայտնել ի վնաս Հայաստանի։ ‘Մենք միամիտ կլինենք, եթե մտածենք, որ Թուրքիան Հայաստանի շահի համար Ադրբեջանի հանդեպ վատ գործողություններ կանի’,-եզրափակեց ղեկավարը։
Լուրեր Հայաստանից - NEWS.am, 13:55 / 16.10.2009 | 
