2009-10-09 22:48:08 ԻՐԱԿԱՆՈՒՄ Ո՞ՒՄ ԿՈՂՄՆ Է ՌՈՒՍ ԵԿԵՂԵՑԻՆ Ռուսաստանի լրատվամիջոցներում հաղորդագրություններ երեւացին, որ Մոսկվայի եւ համայն Ռուսիո պատրիարք Կիրիլին հրավիրել են այցելել... Վրաստան: Ռուս-վրացական ներկա խրթին քաղաքական հարաբերությունների ֆոնի վրա առաջարկն առավել քան էկզոտիկ է թվում:
Ճիշտ է, վրացիները պատրիարքին հրավիրել են որպես խաղաղության յուրօրինակ մունետիկի: Բանն այն է, որ Կիրիլը հաճախ է հայտարարում ռուս եւ վրաց եեղեցիների միասնության մասին, ճանաչում է վերջինիս կանոնական սահմանները եւ այլն: Թեեւ, մյուս կողմից, դա բնավ չի խանգարում, որ ռուս եկեղեցին ակտիվորեն համագործակցի նաեւ Աբխազիայի եւ Հարավային Օսիայի եկեղեցական կառույցների հետ: Իսկ վերջերս Աբխազիայի ուղղափառ եկեղեցին հայտարարեց, որ պաշտոնապես անջատվում է վրաց եկեղեցուց: Սուխումի մայր տաճարում հավաքվել էին թեմի բոլոր եկեղեցական սպասավորները եւ ընդունել նման որոշում: Ավելին, հավաքվածները օգնության խնդրանքով դիմել էին նաեւ Մոսկվայի պատրիարքարանին:
Ահա եւ հարց է առաջանում` իմաստ ունի՞ Կիրիլի այցը Վրաստան: Գուցե նրա ,չեզոքե դիրքորոշումը, եթե Կրեմլի գործողությունները միանշանակ համարենք հակավրացական, ինչ-որ հույսե՞ր է առաջացնում վրացիների մեջ: Բայց արդյոք մե՞ծ է հոգեւոր դիվանագիտության դերը քաղաքական անողոք ու պրագմատիկ իրողությունների մեջ: Հազիվ թե: Թե՞, ինչպես ասում են, խեղդվողը փրփուրից էլ է բռնում:
Նորերս Ռուսիո պատրիարքը այցելեց Բելառուս: Երկրի ղեկավար Ալեքսանդր Լուկաշենկոյի հետ հանդիպման ժամանակ նա խոստացավ նպաստել ռուս-բելառուսական հարաբերություններում նկատվող որոշ անհարթությունների վերացմանը: Ասել է, թե Կիրիլը իսկապես չի էլ խուսափում որոշակի քաղաքական ֆունկցիաներից: Սակայն ընդունված է ասել, որ ոչինչ չի հեղինակազրկում եկեղեցուն այնքան, որքան նրա անհարկի մերձեցումը պետության հետ: Համենայն դեպս ռուսաստանյան լիբերալ լրատվամիջոցները այս պարագան թիրախ են դարձնում ռուս եկեղեցուն (Կիրիլին) հարվածներ հասցնելու համար: Բայց իրո՞ք Կիրիլը այդ աստիճան մերձեցած է Կրեմլի հետ: Նա այնքան իրատես մարդ է, որ հազիվ թե փորձի խառնվել, օրինակ, վերջինիս արտաքին քաղաքականության կովկասյան ուղղությանը: Սակայն ակնհայտ է նաեւ այն, որ Կիրիլը Կրեմլին հասկացնում է, որ ինքը ինքնավարության է ձգտում նրա հետ հարաբերություններում, որ այդ ասպարեզում պատրաստ է լինել նրա գործընկերը, բայց ոչ կլիենտը:
ՌՈՒԲԵՆ ՀԱՅՐԱՊԵՏՅԱՆ, Մոսկվա | 
