ՀԱՄԱՀԱՅԿԱԿԱՆ ՄՐՑՈՒՅԹ

ՀԱՄԱՀԱՅԿԱԿԱՆ ՄՐՑՈՒՅԹ

"Հայապահպանության գործում ունեցած նշանակալի ավանդի համար"

"Լավագույն հայկական կրթօջախ" անվանակարգ

Հայաստանի Հանրապետության սփյուռքի նախարարությունը և Համաշխարհային հայկական կոնգրեսը հայտարարում են համահայկական ամենամյա մրցույթ` "Հայապահպանության գործում ունեցած նշանակալի ավանդի համար":

Մրցույթի նպատակն է խրախուսել Սփյուռքում հայ ազգային ինքնության պահպանման ու զարգացման հարցում կազմակերպությունների, տարբեր խմբերի, առանձին անհատների ունեցած ներդրումը, հավուր պատշաճի գնահատել և արժևորել այս ուղղությամբ հայկական համայնքների գործունեությունը:

2010թ. մրցանակաբաշխության շրջանակներում սահմանված "Լավագույն հայկական կրթօջախ" մրցույթին կարող են մասնակցել Սփյուռքում գործող հայկական կրթօ­ջախ­նե­րը` ամենօրյա, մեկօրյա (կիրակնօրյա) դպրոց, վարժարան, որոնք բավա­րա­րում են հետևյալ չափանիշներին`

• Գրանցված է՝ որպես դպրոց (վար­ժարան) կամ գործում է՝ որպես մասնագիտացված կրթական հաստատութ­յուն՝ տեղի հայկական կազմակերպությանը կամ եկեղեցական կառույցին կից:
• Գործում է առնվազն հինգ տարի:
• Կրթօջախում դասավանդվում են առնվազն հետևյալ հայագիտական առարկաները` հայոց լեզու (արևմտահայերեն և/կամ արևելահայերեն), հայոց պատմություն, և/կամ հայ եկեղեցու և մշակույթի պատմություն:

Մրցույթին մասնակցել ցանկացող կրթօջախները մասնակցության հայտերը (հայտի ձևը կցված է) լրացնում և ներ­կայացնում են մրցութային հանձնաժողովին հետևյալ հասցեներով կամ էլ.փոստով`

Հայաստանի Հանրապետության սփյուռքի նախարարություն` Հայաստանի Հանրապետու­թ­յուն, Երևան, Վազգեն Սարգսյան 26/1

Էլ. հասցե` ministry@mindiaspora.am; allarmenian@mindiaspora.am; press@mindiaspora.am;

կայքեր` www.mindiaspora.am; www.spyurq.am

հեռախոս՝ (+37410) 58 56 01 (1-17)

Պատասխանատու՝ Ս. Համբարյան

Համաշխարհային հայկական կոնգրես` Հայաստանի Հանրապետություն, Երևան, Տերյան 69, 4-րդ հարկ

Էլ. հասցե` wac@armcongress.org

կայք` www.armcongress.am

հեռախոս՝ (+37410) 51 04 49

Պատասխանատու՝ Ս. Անտինյան

Կրթօջախներն իրենց հայտերը կարող են ուղարկել նաև տվյալ երկրի /երկրամասի, շրջա­նի/ համապատասխան համայնքային /համահայկական/ կազմակերպության կամ եկեղեցու թեմական խորհրդի միջոցով` ստանալով նրա երաշխավորությունը:

Հայտի ձևերը տեղադրված են ՀՀ սփյուռքի նախարարության և Համաշխարհային հայկական կոնգրեսի կայքերում (տես` ստորև "ներբեռնել" կոճակը), ինչպես նաև "Կրթական համալիր էջ" պորտալում` www.armedu.am:

Դիմելու վերջնաժամկետը 2010 թ. մարտի 30-ն է։

Հայտերի ընդունումը կսկսվի մրցույթի հայտարարման օրվանից և կշարունակվի մինչև մարտի 30-ը։ Փոստով առաքված հայտերն ընդունելիս որպես հիմք կընդունվի առաքման օրվա վերաբերյալ փոստային նշումը։

Լավագույն հայկական կրթօջախ անվանակարգում սահմանվել են հետևյալ մրցանակները.

• Լավագույն ամենօրյա դպրոց - 3 գլխավոր մրցանակ, խրախուսական մրցանակներ
• Լավագույն մեկօրյա /կիրակնօրյա/ դպրոց - 3 գլխավոր մրցանակ, խրախուսական մրցանակներ

Մրցույթի կազմակերպումը և անցկացումը

Մրցույթն անցկացվելու է Մրցույթի կազմակերպման և անցկացման կարգին համապատասխան: Յուրաքանչյուր անվանակարգի համար ձևավորվելու է մրցութային հանձնաժողով, որը գնահատելու է առաջադրված հայտերը և ընտրելու է մրցույթի հաղթողին:

Հայտերի նախնական գնահատումից հետո մրցութային հանձնաժողովը կարող է դիմել հավակնորդին` վերջինիս գործունեությունը լուսաբանող տպագիր նյութեր, գրքեր, հրատարակություններ, բրոշյուրներ, տեսաերիզներ, լուսանկարներ և այլն նյութեր տրամադրելու խնդրանքով:

Մրցանակները և մրցանակաբաշխությունը

Մրցանակները հաղթողներին կհանձնվեն 2010 թ. հոկտեմբերին՝ մրցանակաբաշխության եզրափակիչ հանդիսավոր արարողության ժամանակ։

ՀՀ սփյուռքի նախարարություն
Համաշխարհային հայկական կոնգրես

See: Application_School.doc

=====================================

Երեւան 2010թ.

ՀՀ սփյուռքի նախարարությունը եւ Համաշխարհային հայկական կոնգրեսը հայտարարում են "Հայապահպանության գործում ունեցած նշանակալի ավանդի համար" ամենամյա մրցույթ Սփյուռքի լրատվամիջոցների միջեւ: Մրցույթին կարող են մասնակցել այն լրատվամիջոցները, որոնք ունեն առնվազն երեք տարվա աշխատանքային գործունեություն և իրենց ուշադրության կենտրոնում են պահում հայապահպանության, Հայաստան-Սփյուռք գործակցության, հայ մշակույթի, կրթության եւ ազգային այլ հարցեր, հրապարակում կամ սփռում են նշված թեմաներով հոդվածներ, ակնարկներ, հաղորդում-հաղորդաշարեր եւ այլն: Մրցույթին ներկայացվում են 2009 թ. հրապարակված նյութերը:

Նախատեսվում է մրցույթի 4 անվանակարգ.

• Հարություն քահանա Շմավոնյանի անվան մրցանակ լավագույն տպագիր լրատվամիջոցին
• Հովհաննես Ադամյանի անվան մրցանակ լավագույն հեռուստաալիքին
• Հակոբ Մեղապարտի անվան մրցանակ լավագույն ռադիոեթերին
• Հրանտ Դինքի անվան մրցանակ լավագույն ինտերնետային լրատվամիջոցին

Մասնակցել ցանկացողները մինչեւ 2010թ. մարտի 30-ը մրցութային հանձնաժողովին պետք է ուղարկեն.

1. Մասնակցության հայտ
2. Հայապահպան գործունեության ամփոփագիր (hավելված):

Բոլոր հարցերով կարող եք դիմել մրցութային հանձնաժողովին հետեւյալ հասցեներով.

ՀՀ սփյուռքի նախարարություն
Ք. Երեւան, Վազգեն Սարգսյան 26/1
Էլ. փոստ` info@mindiaspora.am
Հեռախոս` +(374 10) 58 56 01-109, +(1 818) 480 67 40

Մրցույթին մասնակցելու պայմանները տեղադրված են.

ՀՀ սփյուռքի նախարարություն վեբ կայքում` www.mindiaspora.am, Համաշխահային հայկական կոնգրեսի վեբ կայքում` www.armcongress.org, ինչպես նաեւ "Հայերն այսօր" էլեկտրոնային պարբերականում` www.hayernaysor.am:

Մրցութային հանձնաժողով

See:

Haytararutyun_media_eng.doc
Haytararutyun_media_rus.doc
Application_Media.doc
Ampopagir_Media.doc

===============================

հայեցակարգ

ՀՀ ՍՓՅՈՒՌՔԻ ՆԱԽԱՐԱՐՈՒԹՅԱՆ ԵՎ ՀԱՄԱՇԽԱՐՀԱՅԻՆ ՀԱՅԿԱԿԱՆ ԿՈՆԳՐԵՍԻ ՍԱՀՄԱՆԱԾ ԱՄԵՆԱՄՅԱ ՄՐՑԱՆԱԿԸ

Հայապահպանության գործում ունեցած նշանակալի ավանդի համար

Հայապահպանությունը (հայ ժողովրդի ազգային ինքնության պահպանումն ու զարգացումը) համազգային գերխնդիր և նպատակ է:

Սփյուռքում հայապահպանության գործում մեր հայրենակիցների` առանձին անհատների, կազմակերպությունների, ստեղծագործական խմբերի գործունեությունը խրախուսելու նպատակով ՀՀ սփյուռքի նախարարությունը և Համաշխարհային հայկական կոնգրեսը որոշել են սահմանել հատուկ մրցանակ "Հայապահպանության /հայ ազգային ինքնության պահպանման և զարգացման/ գործում ունեցած նշանակալի ավանդի համար" և հայտարարել համահայկական ամենամյա մրցույթ:

Մրցանակները տրվելու են հետևյալ անվանակարգերի համար`

1. Լավագույն հայ համայնքային կառույց

Շնորհվում է սփյուռքահայ համայնքային կառույցին, որն իր գործունեությամբ.

• առավելագույնս նպաստում է տեղի հայ համայնքի ինքնակազմակերպմանն ու համախմբմանը,
• նպաստում է հայոց լեզվի, ազգային արժեքների, ավանդույթների, սովորույթների պահպանմանը,
• ամուր կապեր է հաստատում հայկական այլ համայնքների և Հայրենիքի հետ,
• համագործակցում է տեղի իշխանությունների հետ, հետևողական է հյուրընկալ երկրում համազգային հիմնահարցերի պատշաճ ներկայացման, լուծման հարցերում:

2. Լավագույն հայկական կրթօջախ

Շնորհվում է Սփյուռքում գործող հայկական կրթօջախին /ամենօրյա և կիրակնօրյա դպրոց, վարժարան, նախակրթարան և այլն/, որը իր երկարամյա գործունեությամբ առավելագույնս նպաստել է սփյուռքահայ երիտասարդության հայեցի կրթությանն ու դաստիարակմանը, նրանց` հայոց լեզվի, գրականության, մշակույթի, պատմության իմացությանը և մասնագիտացմանը:

3. Լավագույն հայագիտական կենտրոն

Շնորհվում է արտերկրի ուսումնակրթական կամ ուսումնական հաստատությանը, կամ առանձին գործող հայագիտական կենտրոնին, ամբիոնին` հայագիտության, հայոց պատմության վերաբերյալ իրականացրած հետազոտությունների, ուսումնասիրությունների, մեծարժեք հրատարակումների համար:

4. Հայ արվեստը տարածող լավագույն ստեղծագործական խումբ

Շնորհվում է երգի, պարի, թատերական արվեստի ոլորտի ստեղծագործական խմբերին, համույթներին, կոլեկտիվներին հայ արվեստը Սփյուռքում ներկայացնելու, տարածելու գործում:

5. Ազգային ավանդույթը, սովորույթը, ծեսը պահպանող լավագույն հայկական ընտանիք

Շնորհվում է սփյուռքահայ ընտանիքին, որը լավագույնս պահպանում է հայկական ավանդույթներն ու սովորույթները, հայ քրիստոնեական ծեսերն ու եկեղեցական տոները:

6. Լավագույն հայկական լրատվամիջոց

Շնորհվում է Սփյուռքում գործող հայկական լրատվամիջոցին /լրագրողին, խմբագրին/, որը հանգամանալից լուսաբանում է համայնքի /համայնքների/ կյանքը, հայության հիմնախնդիրները, բովանդակալից քարոզչությամբ նպաստում է ազգային արժեքների պահպանմանն ու զարգացմանը, մշտական կապի մեջ է Հայրենիքի հետ:

7. Հայ ժողովրդի բարեկամ

Շնորհվում է օտարազգի պետական, քաղաքական, հասարակական, գիտական, մշակութային գործչին, որն իր գործունեությամբ էապես աջակցել է մեր ազգային հիմնահարցերի կարգավորմանը, Սփյուռքում հայապահպանության գործին:

Մրցանակները յուրաքանչյուր անվանակարգի համար շնորհվելու են որոշակի պարբերականությամբ /մրցութային ժամանակահատված/ և հանձնվելու մրցանակաբաշխության հանդիսավոր արարողությամբ:

Հաղթողները կստանան համապատասխան անվանակարգի վկայագիր, մրցանակ և դրամական պարգև:

Մրցույթի հայտարարման, հավակնորդների ընտրության, նրանց գնահատման, ինչպես նաև արդյունքների ամփոփման և հրապարակման նպատակով յուրաքանչյուր անվանակարգի համար ձևավորվելու է Հանձնաժողով: Առանձին անվանակարգերի համար եզրակացությունների ստացման նպատակով Հանձնաժողովը կարող է իրեն կից կազմավորել մասնագիտական հանձնախմբեր:

Մրցույթի կազմակերպման և անցկացման, հավակնորդների ներկայացման, նրանց ընտրության, ինչպես նաև Հանձնաժողովների /հանձնախմբերի/ ձևավորման և գործունեության հարցերը կարգավորվելու են "Մրցույթի կազմակերպման և անցկացման հատուկ Կարգով" և առանձին անվանակարգերի համար նախատեսված Ընթացակարգերով:

ՀՀ սփյուռքի նախարարություն
Համաշխարհային հայկական կոնգրես

Նորացված է` 2010-02-08 18:17:02